現年45歲的拿督千金莊思敏近年轉戰KOL界，不時拍片與眾同樂。近日網上瘋傳她疑在餐廳內吸煙的影片，引起外界極大回響。從片中環境推斷，當時莊思敏身處北角一間餐廳內，鏡頭拍下她吞雲吐霧，之後將煙狀物傳給身旁男友人。另一短片清晰可見心情靚爆的她，邊聽着台灣樂隊茄子蛋的歌曲《浪子回頭》邊搖擺身體兼跟着唱，心情High爆，同時拍下其男友人將疑似香煙傳給另一個人。

香港已實施室內禁煙接近20年，影片曝光後即時引起熱議，發文者無奈表示：「莊思敏and無品friends餐廳食雪茄，係咪當咗自己私竇呀，自私X。」貼文引來其他網民加入討論，揶揄莊思敏：「可能近排的士牌價大跌，所以壓力太大！」同時鬧爆她涉嫌在室內吸煙屬違法，更有網民質疑她手上的不像煙或雪茄：「Share得點會係茄（雪茄）」、「雪茄會Pass？」另有人指出她既然可以公然吸煙，應該是得到該餐廳許可，或者當時正在參與私人派對。有口痕友更表示，即使違法只不過罰款1,500元了事，對於貴為「拿督千金」的莊思敏來說只是雞毛蒜皮，根本起不到阻嚇作用。

事件在網上持續發酵，莊思敏終於在社交平台現身，但並非為事件解畫，而是公開一名女子的照片，相中人身處的地方，與她「出事」的疑為同一餐廳，網民即估計她揪出拍片者作出公審，她發文：「我有個朋友仔想認識吓呢位靚女。可唔可以做個紅娘，有冇人識呀？」貼文一出無異於火上加油，網民狂轟莊思敏作為公眾人物，不但未有為個人行為道歉或解釋，反而公審挺身而出的拍片者及疑似作出威嚇，行為令人髮指。約兩小時後，莊思敏才刪走貼文。

對於疑在室內吸煙一事，莊思敏接受本報訪問時表示：「首先嗰支係雪茄仔，如果係我食嘅，佢點會冇我食煙同噴煙相，我係Pass（傳遞）咋。當時亦唔係打開門做生意，所以其他人都比較放鬆。Anyway，下次會注意吓！」至於疑公開拍攝者樣貌作公審，其後又刪文一事，她說：「係誤會，有個Friend唔記得佢叫咩名，想搵吓，我忘記咗個私人社交網依家綁定咗另一個社交網帳號，所以變咗公開Post！」問到是否已知道誰人拍下相關短片？她說：「唔知呀，都係個老闆Friend啲Friend！今次發生咁大嘅誤會，搞笑。」