嗚嗚，龍哥真係型到震！一身酒紅色老西，坐住Cybertruck入場，氣勢不同凡響！呢版Highball，罐身係彩色嘅「招牌雛菊」，寓意係咩，所有FAM都好清楚，之唔係「即使缺咗一塊花瓣並不完美，但也沒關係」囉！嗱，之前兩版Highball限量88萬罐，好快就被一掃而空，預料今次又係瘋搶！

之不過，南韓演藝界出名道德L上身，龍哥塞車遲到40分鐘，在場記者隨即炒蝦拆蟹，即時新聞大字標題話佢坐Cybertruck都遲到，耍大牌喎！哈，講真，以龍哥呢個級數，遲到少少啫，使唔使咁大件事？搞到龍哥一落車即刻冇晒笑容，真係小事化大。

其所屬公司即時宣布，龍哥會捐出8.8億韓圜，用於支持青少年酗酒治療計劃。即係咁，龍哥賣酒一個「型」字講晒，但喺大韓民國難免招人話柄，批評佢鼓吹飲酒教壞細路。惟有賺錢之餘即刻科水，做吓社福教育，都成500幾萬港紙㗎。

今番全面復出，龍哥究竟有幾多錢落袋呢？喂，淨係簽約畀現公司，身價已高達200億韓圜，即係1.14億港元，成為K-Pop界No.1！當中一半收Cash，另一半係公司股票期權。佢公司正準備上市，合作單位包括中國嘅騰訊、台灣嘅威剛科技，仲有進軍元宇宙大計添。所以啫，賣酒只係小兒科，龍哥目標係搵大錢呀！