藝人高鈞賢（Matthew）去年底宣布與圈外女友Christine結婚，愛情結晶品Liona出世後，一家3口幸福美滿，女兒現已4個多月大，更迎來不少「BB」工作機會，他笑說：「阿女奶粉錢是她自己賺回來。」

忙拍無綫新劇《新聞女王2》的他，一有時間即黐實女兒，他說：「我爸爸係一個絕世好男人，直到依家，佢同我媽咪個電話都冇上網功能，佢兩個有對方就可以，而所有精力就放晒喺我同家姐身上，所以我都希望有爸爸嗰種對家庭嘅愛同責任感。」當年他兩歲生日時，爸爸抱着他拍了一張親密照，今日父親節，Matthew亦抱着囡囡「複製」一張作紀念，他說：「BB朝早最活潑，有時收工幾攰都好，都會同佢玩一陣，享受兩父女嘅獨處時光。」

近年Matthew有不少工作機會，香港、內地兩邊走，而他將有新挑戰，下月25日在廣州舉行首個音樂會。事緣早前他在直播唱歌，獲主辦方賞識，促成今次音樂會，他又密謀籌備舞台劇，希望作更多新嘗試。不過，他直言不捨得離開女兒太久，工作上會作出取捨，他感慨地說：「囡囡4個月大，到佢20歲時我都60歲，如果放晒時間做嘢就陪唔到佢，加上媽媽乳癌要化療同電療，想多啲陪屋企人。」

太太上一段婚姻與前夫育有一對子女，分別是11歲繼子和10歲繼女，早前繼女一個要求令他的心完全融化，他說：「佢同太太講想改姓高，我細個喺加拿大生活，見好多同學同繼父母相處融洽，喺西方好普遍，我付出嘅愛不求回報，等佢再大啲自己決定啦！」