港隊隨着早前在亞運、亞洲盃外圍賽等賽事屢創佳績，開始引來更多關注，足總主席霍啟山受訪時亦指喜見球場上經常出現「紅海一片」，並多次強調球迷屬於足球重要一環：「香港足球要產業化、有市場，就需要球迷。所以今年已經設有6場小型見面會，又安排地方同球迷一齊睇波，上述過往係冇試過，而未來會有更豐富內容。」同時，「霍生」又表示自己一直虛心聆聽球迷意見，盼雙方繼續加強溝通：「好似我哋保證全部港隊作客有直播，同埋早前同波衫供應商Nike續約，都強調要加量、加銷售點，令球迷更容易購買。」

對於足總早前曾在《2020-2025 策略計劃》，列明港隊會以爭取出戰2034年世界盃為目標。轉眼間已過了5年，「霍生」直言會繼續支持本地球員追逐足球夢：「出戰世界盃係每個球員夢想，足總會提出實質措施，包括加強發展青訓，令足球人口加大，貢獻更多青年球員。」

此外，提到啟德體育園的啟用，「霍生」亦顯得相當開心，又稱正構思將啟德體育園作為港隊主場，惟一切仍有待落實：「早前測試賽坐滿5萬人，氣氛非常好。依家同對方探討緊長遠合作，始終唔止淨係一場90分鐘嘅波，想做到產業化，無論售票、飲食同交通都要搞好。」

連同原有的香港大球場及旺角大球場，「霍生」認為香港目前有充足條件，爭取主辦更多國際比賽：「特別係三角賽，或者一啲青年錦標賽，因為除咗旺角場同大球場，依家仲有體育園。唔似以前咁有限制，同時間只係踢得一、兩場比賽，大大提升競爭力。」

另一方面，來季港超聯的隊數亦成為焦點，但「霍生」認為有過今季9隊、上季11隊的經驗，球隊的整體質素，相比隊數更顯重要：「10隊係比較理想，但根據今年經驗，其實9定11隊，編賽程喺技術上都係冇問題，足總角度係按照市場需求。不過我哋覺得量係重要，但下一步更着重係質素，希望聯賽可以維持高水平，令球隊喺亞洲賽取得好成績。」

至於今季新增設的港超聯U22聯賽，「霍生」指概念與早前解散的香港U23相同，大讚這項賽事可以提供更多渠道及機會予青年球員，讓他們之後接軌職業：「由淨係香港U23一隊，變到依家成個港超聯一齊參與。數據見到U23球員上場比例唔超過10%，但U22聯賽就唔可以多過3名超齡球員，絕對提供到更多人才畀港超聯、港隊，長遠提升本地足球水平。」圖、文：李浚湣